Gjermania rrezikoi qysh në minutën e dytë, pas një kombinacioni midis kapitenit Lahm dhe Mylerit, me këtë të fundit që pati një tjetër rast në të 6’, pas krosimit të Podolskit. Myler ishte protagonisti i dhjetë minutave të para, përpara se Mario Gomezh, autor i tre golave në dy ndeshjet e para, të shpërdoronte një rast në minutën e 12-të. Blerja e re e Arsenalit, Lukas Podolski, shënoi në minutën e 19-të për Gjermaninë, me golin e tij të parë në këto finale. Numri 10 i Gjermanisë transformoi në gol një goditje me të djathtën nga rreth dy metra, pas një iniciative të Mylerit nga e djathta. Për Podolskin ky ishte golin i tij i 44-t me Kombëtaren. Por, pas pesë minutash, Krohn-Dehli, njeriu që mposhti Holandën në ndeshjen hapëse, barazoi rezultatin 1-1. Danezi shfrytëzon një pasim ajror të Bendtnerit, për të mposhtur Manuel Nojerin me një goditje me kokë. Sërish Kron-Dehli, protagonist në të 28’. Minuta e 33-të ofroi një super rast për Gomezhin. Podolski krosoi dhe qendërsulmuesi i Bajernit e devijoi topin në fluturim. Dominimi gjerman vazhdoi në pjesën e dytë, kur “Mannschaft” shënoi me anë të Benderit (80’). Gjermania i mbylli ndeshjet në grup me tri fitore. 

Ashtu siç edhe kishte deklaruar, trajneri holandez Bert van Marvijk luajti me dy sulmues të deklaruar, Huntelar dhe Van Persin, me Van der Vartin në mesfushë. Portugalia e nisi lojën me një presion të fortë, duke duke goditur disa herë me kapitenin Kristiano Ronaldo. Gjithsesi, Van der Vart tregoi klasin e tij me një të majtë të shkëlqyer nga jashtë zonës që “verboi” Rui Patrision në minutën e 16-të. Ronaldo dhe Meireles u bënë protagonistë të disa sulmeve, ndërkohë Postiga mund ta kishte barazuar rezultatin në të 17’. Ronaldo humbi një shans të mirë në të 23’, për të barazuar në minutën e 28-të, me një të djathtë të saktë në zonë, duke shfrytëzuar mrekulisht pasimin e Pereirës. Kristiano Ronaldo, u shndërrua nga i “urryeri” në heroin e Portugalisë, kur shënoi golin e dytë në minutën e 74-t pas asistit të Nanit. Dy gola për Ronaldon.