Pas thyerjes së hundës dhe katër dhëmbëve, pas përplasjes me një mbrojtës të skuadrës së tij, gjatë ndeshjes se Novara-Bolonja, më 16 tetor 2011, e që i kushtoi portierit kosovar dy muaj larg fushave, Samir Ujkani pësoi një frakturë në dorë, gjatë ndeshjes Roma-Novara 5-2.
Portieri i Kombëtares shqiptare luajti vetëm pjesën e parë, ku pësoi edhe dy gola, pasi u zëvendësua për shkak të dëmtimit. Në të dytën luajti veterani Alberto Fontana.
Lojtari i Romës, Simon Kjaer, i dërgoi një mesazh miqësor, mikut dhe ish-shokut të tij të skuadrës, Samir Ujkanit, ky u fundit u transportua në spital. “Gjithë të mirat dhe shërim të shpejtë mikut dhe ish-shokut të skuadrës te Palermo, Samir Ujkani!. Sa më shpejt vëlla!”.
E menjëhershme ishte dhe përgjigja e Ujkanit përmes rrjetit social, Twitter. “Faleminderit miku! Luajte një ndeshje të madhe!”
Përsa i përket ndeshjes, Karaçolo i Novarës shënoi i pari në minutën e 17-të, ndërkohë që Roma e mbylli pjesën e parë në fitore 2-1, falë golave të Marikonjos 25’ dhe Osvaldos 35’. Në pjesën e dytë për Romën shënuan Simpliço 55’, Bojan 61’ dhe Lamela 90’+2. Për Novarën realizoi golin e dytë Morimoto 78’.
