Shqipëria ndodhet në grupin E, së bashku edhe me Norvegjinë, Slloveninë, Zvicrën, Qipron dhe Islandën dhe, duke parë edhe madhësinë e audiencës televizive të atyre vendeve shuma maksimale e kombinuar e ofruar është 1.25 milionë euro, katër herë më pak të ardhura seç u arkëtuan në Euro 2012, 5.1 milionë euro.
Për eliminatoret e Kampionatit Europian 2008, kur në grupin tonë bënin pjesë Holanda, Rumania, Bullgaria, Sllovenia, Kazakistani dhe Luksemburgu, FSHF-ja përfitoi 2.8 milionë euro. Për eliminatoret e Kampionatit Botëror 2010, me kundërshtarë të tillë si Danimarka, Portugalia, Suedia, Hungaria dhe Malta, në arkat e Federatës hynë 3.2 milionë euro.
Për eliminatoret e Kampionatit Europian 2012, me një gjigante si Franca, por dhe me Rumaninë, Bosnjën, Bjellorusinë dhe Luksemburgun, u arrit shuma rekord: 5.1 milionë euro, ku pjesën e luanit e zuri Franca, me 4.2 milionë euro. Të drejtën televizive të FSHF-së, në edicionin e fundit e ka menaxhuar kompania “UFA Sports”.
Duke parë edhe madhësinë e audiencës televizive të vendeve si Norvegjia, Sllovenia, Zvicra, Qipro dhe Islanda, ajo kontratë 5.1 milionëshe duhet të vendoset në një kornizë ari dhe të varet në Muzeun e ri të FSHF-së.
